1Cor 13 | KhmKCB | STEP | ទោះបី ខ្ញុំអាច និយាយ ភាសា របស់ មនុស្ស និង ភាសារបស់ ពួក ទេវតា ក៏ដោយ បើ គ្មាន សេចក្ដី ស្រលាញ់ ទេ ខ្ញុំ ត្រលប់ ដូចជា គង ដែល បញ្ចេញ សម្លេង ឬ ជួង ដែល ឮ ខ្ទរ ។

1 Corinthians 13

1 ទោះបីខ្ញុំអាចនិយាយភាសារបស់មនុស្សនិងភាសារបស់ពួកទេវតាក៏ដោយបើគ្មានសេចក្ដីស្រលាញ់ទេខ្ញុំត្រលប់ដូចជាគងដែលបញ្ចេញសម្លេងឬជួងដែលឮខ្ទរ។ 2 ទោះបីខ្ញុំអាចថ្លែងព្រះបន្ទូលនិងស្គាល់អស់ទាំងអាថ៌កំបាំងព្រមទាំងមានចំណេះដឹងគ្រប់យ៉ាងក៏ដោយឬទោះបីខ្ញុំមានជំនឿរហូតដល់រើភ្នំបានក៏ដោយប៉ុន្ដែបើគ្មានសេចក្ដីស្រលាញ់ទេខ្ញុំគ្មានបានការឡើយ។ 3 ទោះបីខ្ញុំចែកទានទ្រព្យសម្បត្ដិទាំងអស់របស់ខ្ញុំហើយសុខចិត្ដឲ្យគេដុតរូបកាយរបស់ខ្ញុំក៏ដោយបើគ្មានសេចក្ដីស្រលាញ់ទេខ្ញុំគ្មានប្រយោជន៍ឡើយ។ 4 សេចក្ដីស្រលាញ់អត់ធ្មត់សេចក្ដីស្រលាញ់សប្បុរសនិងមិនច្រណែនសេចក្ដីស្រលាញ់មិនអួតខ្លួននិងមិនបំផ្លើស 5 មិនឈ្លើយមិនរកប្រយោជន៍ផ្ទាល់ខ្លួនមិនក្ដៅក្រហាយមិនប្រកាន់ទោស 6 មិនត្រេកអរនឹងសេចក្ដីទុច្ចរិតឡើយប៉ុន្ដែត្រេកអរនឹងសេចក្ដីពិតវិញ 7 ទ្រាំទ្រទាំងស្រុងជឿទាំងស្រុងសង្ឃឹមទាំងស្រុងហើយស៊ូទ្រាំទាំងស្រុង។ 8 ទោះបីការថ្លែងព្រះបន្ទូលនឹងត្រូវកន្លងផុតទៅភាសាចម្លែកអស្ចារ្យលែងមានហើយចំណេះដឹងនឹងត្រូវសាបសូន្យក៏ដោយក៏សេចក្ដីស្រលាញ់មិនសាបសូន្យឡើយ 9 ដ្បិតយើងចេះដឹងតែមួយចំណែកហើយថ្លែងព្រះបន្ទូលបានតែមួយចំណែកទេ 10 ប៉ុន្ដែពេលភាពពេញលេញមកដល់នោះភាពមិនពេញលេញនឹងសាបសូន្យ។ 11 កាលខ្ញុំនៅជាកូនក្មេងខ្ញុំនិយាយដូចជាកូនក្មេងគិតដូចជាកូនក្មេងហើយយល់ឃើញដូចជាកូនក្មេងប៉ុន្ដែពេលខ្ញុំត្រលប់ជាពេញវ័យខ្ញុំក៏បញ្ឈប់អ្វីៗដែលជាលក្ខណៈកូនក្មេង។ 12 ដ្បិតឥឡូវនេះយើងមើលតាមកញ្ចក់ឃើញមិនច្បាស់ទេប៉ុន្ដែនៅពេលក្រោយយើងនឹងឃើញមុខផ្ទាល់។ ឥឡូវនេះខ្ញុំស្គាល់ព្រះអង្គតែមួយចំណែកប៉ុន្ដែក្រោយមកខ្ញុំនឹងស្គាល់ព្រះអង្គច្បាស់ដូចជាព្រះអង្គស្គាល់ខ្ញុំច្បាស់ដែរ។ 13 ដូច្នេះឥឡូវនេះមានសេចក្ដីបីដែលនៅគង់វង្សគឺជំនឿសង្ឃឹមនិងសេចក្ដីស្រលាញ់ប៉ុន្ដែក្នុងចំណោមទាំងបីនេះសេចក្ដីស្រលាញ់វិសេសជាងគេ។